الشروط والأحكام

1. الخدمة

Rent Plus نظام على الإنترنت لإدارة مكاتب تأجير المعدات: الحجوزات، المخزن، العملاء، الفواتير والعقود، الحسابات، والتنبيهات على تليجرام. الخدمة بتتقدم "زي ما هي" وبنطورها باستمرار.

2. الحساب والاشتراك

• كل مكتب ليه حساب منفصل، وصاحب المكتب مسؤول عن أفراد فريقه والصلاحيات اللي بيديها لهم.
• الاشتراك شهري ويتدفع مقدمًا. لو الاشتراك اتأخر، الحساب بيفضل شغال فترة سماح قصيرة، وبعدها بيبقى قراية بس لحد التجديد.
• تقدر توقف الاشتراك في أي وقت، وتقدر تنزّل كل بياناتك قبلها.

3. بيانات المكتب وعملائه

• البيانات اللي المكتب بيدخلها (المعدات، العملاء، الحجوزات، الفلوس) ملك المكتب.
• المكتب مسؤول إنه ياخد موافقة عملائه على جمع بياناتهم وصور مستنداتهم، وإنه يستخدمها في حدود التأجير بس.
• Rent Plus مش طرف في التعاقد بين المكتب وعميله، والفاتورة والعقد اللي النظام بيطلعهم بيعبروا عن المكتب.

4. شبكة المكاتب

لما المكتب يفتح نفسه في الشبكة، المكاتب المشتركة التانية بتشوف أسماء المعدات الفاضية وسعر المكاتب بس. أي اتفاق أو تسليم أو تلف بين مكتبين مسؤوليتهم هم، وRent Plus بيوفر أداة التنسيق بس.

4ب. الحجز أونلاين وسوق المعدات

المكتب اللي بيفتح صفحة الحجز بيظهر للعملاء اسمه ومعداته المتاحة وسعر اليوم. لو المكتب اختار يظهر في سوق Rent Plus، المصورين بيقدروا يلاقوا معداته وهم بيدوّروا في كل المكاتب. الطلب اللي بييجي من الصفحة أو السوق هو طلب حجز، والمكتب هو اللي بيأكده ويتعاقد مع العميل.

4ج. تحذيرات العملاء بين المكاتب

لما مكتب يحظر عميل، بيختار سبب من قايمة ثابتة (زي "مدفعش الحساب"). المكاتب التانية بتشوف تحذير لو نفس رقم الموبايل اتعامل معاها: عدد المكاتب اللي حظرته والسبب بس، من غير اسم المكتب ولا أي تفاصيل تانية. المكتب مسؤول إن الحظر يكون لسبب حقيقي، ولما يشيل الحظر التحذير بيتشال على طول.

5. المساعد الذكي

المساعد على تليجرام بيفهم الرسايل والفويس ويقترح الحجوزات والحسابات. مبيسجلش أي حاجة غير بعد تأكيد المستخدم، والمستخدم مسؤول إنه يراجع الملخص قبل ما يوافق.

6. الاستخدام المسموح

ممنوع استخدام النظام في أي حاجة مخالفة للقانون، أو محاولة الوصول لبيانات مكتب تاني، أو تحميل الخدمة بشكل يضر باقي المكاتب.

7. المسؤولية

بنبذل أقصى جهد إن الخدمة تبقى شغالة وبياناتك محفوظة بنسخة احتياطية يومية، لكن مسؤوليتنا في أي حالة مش هتزيد عن قيمة اشتراك آخر شهر.

8. التعديلات

ممكن نعدّل الشروط دي، وهنبلغ المكاتب بأي تغيير مهم قبلها بوقت كافي.

سياسة الخصوصية

بنجمع إيه

• بيانات المكتب وفريقه: اسم المكتب، أسماء وأرقام وإيميلات أفراد الفريق، وحساب تليجرام لو اتربط.
• اللي المكتب بيدخله: المعدات، الحجوزات، الفواتير، المدفوعات، المصاريف.
• بيانات عملاء المكتب: الاسم، الموبايل، وصور المستندات اللي العميل بيرفعها في صفحة التسجيل.
• طلبات الاشتراك: الاسم ورقم الموبايل والمكتب لما حد يملا الفورم في الموقع.

بنستخدمها في إيه

• تشغيل الخدمة للمكتب: الحجوزات، الفواتير، التنبيهات.
• التواصل مع المكاتب بخصوص الاشتراك والدعم.
• مش بنبيع البيانات ولا بنستخدمها في إعلانات.

مين بيشوفها

• بيانات كل مكتب بيشوفها فريق المكتب ده بس، كل واحد حسب صلاحياته.
• لو عميل اتحظر عند مكتب، رقم موبايله وسبب الحظر (من قايمة ثابتة) بيظهروا كتحذير للمكاتب التانية لو اتعاملت مع نفس الرقم.
• صفحة الحجز أونلاين بتعرض المعدات المتاحة وسعر اليوم بس، وبيانات اللي بيطلب (الاسم والموبايل) بتروح للمكتب اللي طلب منه بس.
• في شبكة المكاتب، المكاتب التانية بتشوف أسماء المعدات الفاضية وسعر المكاتب بس.
• بنستخدم خدمات تشغيل موثوقة: Google (الاستضافة والتخزين)، Cloudflare (توصيل الموقع)، Telegram (التنبيهات)، ومزودي الذكاء الاصطناعي (فهم الرسايل والفويس للمساعد) وبيتبعتلهم المحتوى اللازم للطلب بس.

حساب Rent+ للمصورين (أبلكيشن Rent+)

لما تعمل حساب على Rent+ عشان تحجز من المكاتب، بنجمع:

• اسمك ورقم موبايلك.
• صورة البطاقة (الوش والضهر) وصورة سيلفي، بتتصوّر بكاميرا الموبايل وقت التسجيل، عشان نتأكد إن الحساب ليك. بنقرا منها الاسم والرقم القومي وتاريخ الميلاد والنوع والمحافظة.
• مكانك التقريبي، بس لو سمحت بيه، عشان نرتبلك أقرب المكاتب. مش بنحفظه على السيرفر.
• طلباتك وتقييماتك للمكاتب، وحساب تليجرام لو ربطته للإشعارات.

صور البطاقة والسيلفي متخزنة عندنا ومش بتتبعت للمكاتب. المكتب اللي بتحجز منه بيشوف اسمك ورقمك وإن حسابك موثّق ومستوى الثقة بس. الكاميرا بنستخدمها لتصوير البطاقة والسيلفي بس، والموقع لترتيب المكاتب بس.

مسح الحساب: تقدر تمسح حسابك في أي وقت من الأبلكيشن: «حسابي» ← «مسح حسابي نهائيًا». ساعتها بنمسح صور البطاقة والسيلفي والاسم والرقم والرقم القومي فورًا، والأوردرات اللي لسه مستنية الموافقة بتتلغي. الطلبات اللي اتنفذت بتفضل في دفاتر المكتب اللي اتعاملت معاه لأنها جزء من حساباته، والنسخ الاحتياطية بتتمسح لوحدها خلال 30 يوم.

الحفظ والحذف

البيانات بتفضل طول ما الاشتراك شغال، ومعاها نسخ احتياطية لآخر 30 يوم. لو المكتب طلب حذف بياناته بعد ما يمشي، بنحذفها، والنسخ الاحتياطية بتتمسح لوحدها خلال 30 يوم.

حقوقك

لو عندك حساب Rent+، تقدر تمسحه بنفسك من «حسابي». أي عميل لمكتب عايز يعرف بياناته أو يصححها أو يمسحها يكلم المكتب نفسه. ولأي سؤال عن الخصوصية كلمنا من صفحة الموقع.